Skapa eit levande sentrum og ei positiv utvikling
«Views» er eit tredelt kunstprosjekt; takskulptur i aluminium på toppen av Sentrumsbygget på Nesflaten, ei fontene på kaien og ein portal på kaien på Nesflaten ved Suldalsvatnet. Alle kom til Nesflaten via kaien før vegen langs vatnet kom på slutten av 70-talet. Dei tre delane i verket til Jeppe Hein handlar om utsikt, om kva ein kan sjå gjennom og over, og er kopla saman i ei treeining.
Gjennom Snøhetta sin arkitektur, inkluderer ein innemiljøet og funksjonar inne i Sentrumsbygget i prosjektet, i tillegg til landskap og miljø rundt bygget. Bygget blir meir brukarvenleg og attraktivt.
Stadutvikling, bygdeutvikling, tettstadutvikling, attraktive distrikt. Dette er omgrep som stadig er løfta fram i arbeidet med å staka ut vegar inn i framtida. Med «Views» set Nesflaten og Suldal seg markant på kartet som eit ambisiøst og framtidsoptimistisk lokalsamfunn. Som andre kan sjå til.
Jeppe Hein
Jeppe Hein er fødd 1974 i København, og bur og arbeider i Berlin. Han studerte ved Royal Danish Art Academy, København og Städelschule, Frankfurt. Hein lagar verk som berre kan opplevast gjennom deltaking, og han utvider forestillinga vår om kva kunst er eller kan vera. Han er opptatt av å gi kunstverket ein sosial kvalitet, og jobbar i skjæringspunktet mellom kunst og arkitektur.
Skulpturane og installasjonane hans hentar inspirasjon frå minimalistisk og konseptuell kunst frå 70-talet og er ofte humoristiske og enkle i form.
Jeppe Hein er ein kunstnar med høgprofilerte prosjekt over heile verda. Noreg vil få eit kunstverk som heile verda vil snakke om. Den store kunsten i den vesle bygda er ei forteljing som vil nå langt og vare lenge.
LIV på NES
LIV på NES er ei foreining som skal arbeida for å skapa ei positiv utvikling i Øvre Suldal gjennom tiltak som stør opp om lokal næringsverksemd, aukar trivsel og tilhøyrsle og skaper bulyst. LIV på NES har arbeidd mot realisering av «Views» sidan 2012. Så langt er prosjektet støtta av Suldal kommune, Ryfylkefondet, KORO, Fondation de France og Rogaland fylkeskommune.